माओवादी असफल भएको होइन समय अनुसार रणनीति परिवर्तन गरेको मात्र हो । तपाइँले एउटा भनाई त सुन्नु नै भएको होला - हिरा काट्न हिरा नै चाहिन्छ । झ्वाट्ट हेर्दा माओवादी आफ्नो लक्ष्यबाट विमुख भएको हो कि जस्तो देखिए पनि यथार्थमा माओवादी त्यही लक्ष्य प्राप्तीको बाटोतर्फ नै लम्किरहेको छ । यदि सजिलै लक्ष्य प्राप्त हुने भए किन गर्नुपथ्र्यो १० वर्षसम्म जनयुद्ध क्रान्ति र संघर्षको बाटो सजिलो छैन र माओवादी पार्टी कुनै जादुगर होइन र कुनै दैवी शक्ति सम्पन्न होइन कि युद्धविराम गरेर शान्ति सम्झौता गर्दैमा नेपालको परिवर्तन हुने । यहाँ त अझै यथास्थितीवादी र परिवर्तन नचाहने राष्ट्रघाती दलाल नेताहरु व्यापक छन् । पहिले तिनीहरुलाई तह लगाउनु पर्यो नि ।
माओवादीको साख गिरेको होइन जबरजस्ती गिराउनको लागि अनेक षड्यन्त्रको तानाबाना बुनेको हो । अहिले नेपालमा अग्रगामी परिवर्तन चाहने एकमात्र क्रान्तिकारी पार्टी माओवादी हो । अरु राजनीतिक दलको चर्तिकला र काला कर्तुतहरु त हामीले नेपालमा प्रजातन्त्रको स्थापना भएदेखि २०४६ सालदेखि नै देख्दै र भोग्दै आएका छौँ । एमाले-कांग्रेस तिनै दल हुन् जसको घृणित राज्यव्यवस्थाको कारण वाध्य भएर माओवादीले हतियार उठाइ सशस्त्र जनयुद्ध गर्नुपरेको थियो । अहिले पनि नेपालमा तिनै एमाले र कांग्रेस हावी भइरहेका छन् । सबै यथास्थितिवादी प्रतिक्रीयावादी र भारतको दलाल, नोकर प्रवृत्तीको नेताहरु मिलेर माओवादीलाई एकल्याउन अनी वदनाम गर्न खोज्दै छन् । मिडिया र छापा माध्यमहरुमा प्रायः तिनीहरुकै पहुँच रहेको छ । त्यसैले उनीहरु आफैँ वाइसिएल माओवादी कार्यकर्ता अनी आफैँ जनसेना बनेर निर्दोष जनता कुट्दै हिँडेका छन् अनी हल्ला फैलाउने गरेका छन् कि "वाइसिएल माओवादी जनसेनाले निर्दोष जनता कुट्यो" भनेर । तर ति घटनाहरुको एकपछि अर्को गर्दै भण्डाफोर पनि हुँदै गरेको छ । भरतपुर क्यान्सर अस्पतालका संचालकको अपहरणमा पनि माओवादीको हात रहेको भनेर हल्ला फिजाइएको थियो तर पछि यथार्थ कुरा सार्वजनिक भयो कि एमाले र कांग्रेस मिलेर माओवादीलाई बदनाम गराउनको लागि विना कारण उसको अपहरण गरिएको भनेर ।
कमरेड प्रचण्डको बोली समय अनुसार फेरिने कारण पनि उनीहरु (एमाले-कांग्रेस) कै कार्यशैली अनुसार उनीहरुकै रणनीतिले उनीहरुलाई नै पछार्ने समयसापेक्षको माओवादी रणनीति मात्र हो अन्यथा केही होइन ।
अहिले नेपालमा शान्ति र संविधान अनी सेना समायोजनको विषयले चारैतिर चर्चा र मिडियामा पनि व्यापक स्थान पाइरहेका छ । माओवादी जनमुक्ति सेनालाई नेपाली सेनामा समावेश गर्न चाहन्छ, तर एमाले र कांग्रेसले यसको विरोध गरिरहेको छ । हाम्रो दृष्टिकोणले हेर्दा एमाले र कांग्रेसको यो विरोध जायज हो । हामी क्रान्तिकारी भइकन पनि यो चाहन्नौँ कि जनमुक्ती सेनालाई नेपाली सेनामा समायोजन गरियोस् चाहे १९,००० जना नै किन नहोस् । यसरी समायोजन गरेर जनमुक्ती सेनाको अस्तित्वलाई कदापी पनि मेटाउन पाइन्न । किनकी नेपाली सेना वास्तवमा नेपाल र नेपाली जनताको हितमा छैन । सिमा सुरक्षा गर्न छाडेर अनाहकमा निर्दोष जनतालाई यातना दिने अनी हत्या गर्ने नेपाली सेनाको कुनै औचित्य र आवश्यकता छैन नेपालमा । जनताको लागि जनताको माझमा रहेर शोषक र सामन्तीहरु विरुद्ध लड्ने, नेपाली जनताको रक्षा गर्ने जनमुक्ति सेनाले आफ्नो छुट्टै अस्तित्व, गौरव र इतिहास बोकेको छ । जनमुक्ति सेनालाई अहिलेको यथास्थितिवादी कथित नेपाली सेनामा समावेश गर्ने होइन, बरु यो नेपाली सेनाको संरचना नै भङ्ग गरेर नेपालमा जनमुक्ति सेनालाई संस्थागत र सरकारी मान्यता प्रदान गरिनु पर्छ ।
