आज देशभर १६ औं जनयुद्ध दिवस मनाईदै

काठमाडौं, १ फागुन । नेपाली जनताले सुरु गरेको जनयुद्ध आज १५ औं बर्ष पुरा गरी १६ औं बर्षमा लागेको उपलक्ष्यमा आज देशभर जनयुद्ध दिवस मनाईदै छ । एकीकृत नेकपा माओवादीको नेतृत्वमा २०५२ साल आजकै दिन अर्थात फागुन १ गते सुरु भएको जनयुद्ध १५ बर्ष पुरा गरी १६ औं बर्ष लागेको छ । आज उत्पीडित जनताले आफ्नो मुक्तिको उद्घोष गरेको दिनका रुपमा देशभर मनाउँछन् । आज एक आपसमा जनयुद्धको शुवकामना आदान प्रदान गर्ने, एक आपसमा अबिर लगाउने र साथीहरुबीच मिठो खाने चलन छ ।

आज एकीकृत नेकपा माओवादीका अध्यक्ष प्रचण्डसहितका शीर्ष नेताहरु जनयुद्धको उद्गम भूमि रोल्पाको थवाङ जाने कार्यक्रम छ । उहाँहरु त्याहाँका जनतासंग जनयुद्धको शुभकामना आदान प्रदान गर्ने र जनताको पीरमार्का बुझ्ने कार्यक्रम रहेको छ । थवाङलाई नेपाली जनयुद्धको येनान पनि भनिन्छ । माओत्सेतुङले चीनमा जनयुद्ध सुरु गरेको ऐतिहासिक स्थान येनान भए जस्तै नेपालको जनयुद्धको उद्गम भूमि थवाङ बनेको छ ।

आज माओवादी नेताहरुले थवाङमा जनयुद्धका सहिद परिवार, बेपत्ता परिवार र घाईतेहरुसंग साक्षात्कार गर्ने कार्यक्रम पनि रहेको छ । माओवादीले आज काठमाडौंको भृकुटी मण्डपमा जनयुद्धको शुभकामना आदान प्रदानकालागि कार्यक्रमको पनि आयोजना गरेको छ ।