"जनवाद" जनवादकै निम्ति बनोस्

कौशल पाण्डे

सिङ्गो देश जनवाद प्राप्तीको नयाँ अभियानमा लागिरहेको बेलामा "जनवाद" नै हातमा लिएर संगीन जी जस्ता जागरुक युवाहरु पत्रकारिता क्षेत्रमा देखिनु भएको छ । यसबाट के आशा गर्न सकिन्छ भने निश्चय पनि जनवाद प्राप्तिको लागि उठिरहेका जनताको अभियानले यसबाट साथ पाउने छ ।

एकथरी मानिसहरु पत्रकारिता पेशाबारे टिप्पणी गर्दा ज्यादै गाह्रो पेशा हो भन्ने गर्छन् । पेशाको दृष्टीकोणले हेर्दा अरु-अरु पेशाभन्दा यो अली फरक त होला तैपनि यो पेशा त पेशै हो । अरु पेशा भन्दा यो पेशामा पाइने भिन्नता भनेको यसले बढी सामाजिक अन्तरकि्रयामा भाग लिनु पर्दछ । सामाजिक अन्तरकि्रयामा भाग लिनुको अर्थ पत्रकारितामा लाग्नेले बढी मात्रामा समाजलाई बुझ्ने अवसर प्राप्त गर्दछ । इमान्दारिपूर्वक पत्रकारिता गर्नेले त समाजभित्र रहेका तमाम अन्तरविरोधहरु राम्ररी केलाउन र बुझ्न सक्छ । त्यसैले एउटा सक्षम पत्रकारले सामाजिक अगुवाको भूमिका निर्वाह गर्न सक्छ भन्ने कुरामा दुई मत नहोला । पत्रकारहरु बौद्धिक अभ्यासी हुन् । बौद्धिक अभ्यास गर्ने क्रममा उनीहरुले आफु बसेको समाजको बनौट बारे पनि थाहा पाउनु पर्ने हुन्छ । वर्गीय समाजमा विभिन्न सामाजिक वर्गहरु स्वभाविकै रुपमा हुने गर्दछ । पत्रकारितामा लाग्नेहरुले समाजमा विद्यमान वर्गहरुमध्ये कुन चाहिँ वर्गको हित हुने गरी चल्ने भन्ने बारे यकिन गर्न सक्नु पर्छ । यसको निम्ति एउटा सक्षम पत्रकार हुन र तदनुरुपको वौद्धिक अभ्यासलाई अगाडी बढाउन उनीहरुले आफू कुन दर्शनमा उभिएर प्रस्तुत हुने हो यसबारे स्पष्ट हुनु जरुरी छ । त्यसैले मलाई के लाग्छ भने पत्रकारहरुले आफ्नो जीवन दर्शन किटान गर्नैपर्छ र आफ्नो मान्यता र आस्था निर्धारण गर्नैपर्दछ । एकथरी पत्रकारिता क्षेत्रमा लागेकाहरु आफूलाई विशेष मानिस भएको बुझ्ने गर्दछन् । वास्तवमा यस्तो धारणा राख्नेहरुले जीवनलाई नबुझेकै हुन् । अझ कोहीकोही त समाजमा हुने नहुने काम गरेर ढाडे पल्टिएकाहरुको अगाडी गिडगिडाउन पाउँदा आफूले पराक्रम गरेको पनि ठान्ने गर्छन् । साँच्चि नै भन्नुपर्दा अहिलेको बजारमा त्यस्तैहरुको बिगबिगी भएको जस्तो पनि देखिन्छ । केलाएरै हेर्ने हो भने त्यो केही पनि होइन । मुख्य कुरा त तपाईंले गरेको पत्रकारिताबाट जनताको मनमा ठाउँ पाएको हुनुपर्छ । मलाई लाग्छ तपाईं युवाहरु पनि यही कुरा बुझेर नै यस क्षेत्रमा लाग्न खोज्नु भएको छ । यसमा तपाईंहरु सफल हुनुहोस् । तपाईंहरुको कामबाट हामी अली अघीकाहरु बढी से बढी आशावादी हुन सक्ने स्थिती बन्यो भने त्यो नै तपाईंहरुको सफलता हो ।

अन्तमा यदाकदा पत्रिका निकाल्नु मात्रै ठूलो कुरा होइन त्यसलाई निरन्तरता दिनु महत्त्वपुर्ण कुरा हो । यो कुरा तपाईंहरुले पनि बुझ्नु भएको छ । जनहितलाई नै आधार बनाएर तपाईंहरु काम

गर्नुहोस् । जनताले यो "जनवाद" रुपी विरुवालाई निश्चय पनि गोडमेल गर्ने छ र एकदिन न एकदिन तपाईंहरु निश्चय पनि फक्रनु हुनेछ ।