माओवादी र एमाले सहमतीय प्रणालीमा सहमती

जनवाद संवादादाता

काठमाडौं, असार-सत्तारुढ प्रमुख दल एमाले र प्रमुख प्रतिपक्षी दल एकीकृत नेकपा माओवादी सहमतीय प्रणालीको पक्षमा सहमत भएका छन् । बहुमतीय राजनीतिले देशलाई बन्धक बनाएको भन्दै दुई दल सहमतीय प्रणालीमा सहमत भएका हुन् । माओवादी अध्यक्ष पुष्पकमल दाहाल प्रचण्डको निवास नयाँ बजारमा मङ्गलबार बिहान भएको दुई दलका शीर्षनेताहरुबीचको बैठकमा यस्तो सहमति भएको हो । बैठकपछि पत्रकारहरुसँग कुराकानी गर्दै एमाले अध्यक्ष झलनाथ खनालले सहमतीय प्रणाली अनिवार्य भएकाले बहुमतीय प्रणाली त्याग्ने सहमति भएको बताए । राष्ट्रिय संयुक्त सरकार नबनाई शान्ति प्रकि्रया र नयाँ संविधानले टुङ्गो नपाउने हुँदा सहमतिका आधारमा नयाँ राष्ट्रिय संयुक्त सरकार बनाउनु पर्नेमा दुबै दल सहमत भएको उनको भनाइ छ । उनले तीन वुँदे सहमति कार्यान्वयनका लागि सबै पार्टीहरु जिम्मेबार हुनुपर्नेमा जोड दिए । बैठकमा सहभागि माओवादीका सचिव पोष्टबहादुर बोगटीले छलफल सकारात्मक भए पनि तत्काल निकास निस्कने जस्तो नभएको जानकारी दिए । उनले सहमतिका लागि एमालेभन्दा कांग्रेस नै बाधक भएको टिप्पणी गरे । प्रधानमन्त्रीले राजीनामा नदिएसम्म सहमति नहुने अडानमा रहेको माओवादी र सेना समायोजन शान्ति प्रकि्रयाको स्पष्ट खाका तयार नभएसम्म प्रधानमन्त्रीले राजीनामा नदिने अडानमा रहेको एमालेका शीर्षनेताबीच मङ्गलबार छलफल भएको हो । दुई दलको शीर्षनेताबीच हुने छलफलमा एमाले अध्यक्ष झलनाथ खनाल नेता भरतमोहन अधिकारी र माओवादी अध्यक्ष पुष्पकमल दाहाल प्रचण्ड बरिष्ठ उपाध्यक्ष मोहन बैद्य सचिव पोष्टबहादुर बोगटी लगायतका नेता सहभागि भएका थिए ।